غزل

اومما درمان اولا احوال پریشانه غزل
نئیله سین قلبیده بو درد فراوانه غزل

زهر دوران سؤزوده شعری ده بیمار ائلئییب
چوخلو بیزدن اؤزو محتاجدی درمانه غزل

داها نه شعر و غزل،نه یازی ایامی ده ییل
ائل آراسیندا یاشیر گؤر نه غریبانه غزل

یوخدو جان بیزده کی تقدیم اولا جانانه لره
نه دی پیمان کی وفا ائیلییه پیمانه غزل

هره بیر یانه قاچیر،باشدی باشین ساخلادی دیر
دهر دون ایچره اولوب هاممیا بیگانه غزل

باخ هامی قاچمادادیر تکجه قارین توخلوق اوچون
چؤرگ اولماز بالا! بو عصریده انسانه غزل

پولو یوخ چوخلارینین اینینه بیر پالتار آلا
اؤرتوگ اولماز مارالیم!قامت عریانه غزل

بو زامان برقدی روشن ائله ین تار گئجه نی
شمع یوخدور یارادا،شهپر پروانه غزل

باغبان پوزدو باغی کؤچ ائله دی شهره ساری
کیم یازار بو پوزولان باغ و گلستانه غزل؟

سوسدو بولبولده،نه واردی سسی،نه وار سراغی
باغچا باغ اولمیاجاق بولبول نالانه،غزل

چوخونون قلبینی دوران دولانیب قان ائله دی
نئیله یر بیر بئله عصره،بئله دورانه غزل

کؤنولوم مسکن اولوب غملره ،قلبیم اود آلیر
نئیله سین سینه ده کی شعله ی سوزانه غزل

قلمی آل اله دفتر دولوسو غصه یازاخ
درد دوران ائله ییب سینه می غمخانه،غزل!

آذرا! بسدی اونود دفتره دای یازما غزل
آخر هاردان یاراشار گوشه ی زندانه غزل؟

عباسعلی شیردل(آذراوغلو)